الغرام في عينه سؤال

جيتي ليلى بالحليب


جيتي ف الصيف الجديب


جيتي شايله الخير وحارسه


جيتي بالشوق والهيام


طارحة أوراق الغرام


زي شجرة حب وارفه


زي توته بضل حاني ع العطاشى


الحرانين


جيتي ُلبنى بالخيال


جيتي عبله بالِجمال


جيتي عَزه بالجَمال


جيتي عفرا وجيتي هند


وانت حامله ف الجِراب


تمر نخله طارحه شهد


مالوش مثال


جايبه قلبك بجناحين


زي طير شايلاه ايدين


حاسس بدفء ومستكين


والغرام ف عنيه سؤال


بس أقولك ايه ياغاليه


ما انتي عارفه ايه الجواب


عصر قلبي ما بين ايديك


ماهوش جواب؟


حبي غالي زي حبك


يعني طير ضامم وليفه


شفتي طير يعشق جراحه ؟


شفتي طير يكسر جناحه؟


طير وفرحان بالعذاب


لو كنتي نار .. عاشق لهيبك


أو كنتي نور رح أدوب ف ضيك


هوا فيه ف الكون مثيلك


وألا فيه ف العمر زيك


**


بتقولي شوقك آخده منك


لو أخدته ازاي احس بشوقك انتي


لو ماشفش الشوق ف عينك


تبقى دي لحظة نهايتي


دا انتي حرفك هوا حرفي


وانتي صمتك هوا صمتي


هاتي حلمك يملا حلمي


هاتي نغمك يقرا لحني


سيبي قمرك يسري ضيه


ما بين ضلوعي


واروي عطشي من حنانك


واشفي من عطفك جروحي


خللي نبضك جوا مني

وف وريدي .. يرد روحي